La Fundación Alvaro Flórez Estrada tien como obxetivu primeru mirar pol patrimoniu políticu de tolos asturianos. El patrimoniu cultural, ecolóxicu, llingüísticu o musical, por dicir cuatru exemplos, ya disponen d'entidaes que los defenden con aciertu. La nuestra contribución como Fundación ha ser centrase nos aspectos puramente políticos que nos enriquecen como pueblu. Queremos favorecer el conocimientu de la nuestra historia común, divulgar el llabor de los nuestros representantes públicos y consolidar la importancia de les nuestres instituciones. En definitiva, queremos contribuir a la nuestra madurez política pa disponer d'unes báses más sólides nes qu'apoyar el nuestru presente y el nuestru futuru autogobiernu.