Unión Renovadora Asturiana

Unión Renovadora Asturiana naz para ocupar un espaciu de centru, autonomista y renovador.

Nun ye esti un centru que s'asitie na equidistancia d'otres formaciones qu'ocupen posiciones na derecha o na izquierda más o menos matizaes; sinon que ye un centru que val como'l puntu y llugar de converxencia onde posiciones personales con clares diferencies n'aspeutos ideolóxicos, puen convivir, cooperar y ayudar al meyor desenvolvimientu d'Asturies.

Asturies ye xera pa tolos asturianos que quieran alcontrar aquellos puntos que mos xunen anantes de los que nos dixebren.

Los pueblos ígüense na so propia Hestoria, Tradición y Cultura, ensámensese nes sos vivencies comunes, desenvuélvense nos sos sentimientos y esprésense na so cultura. N'Asturies hai un soporte físicu y xeográficu definíu ente la mar y les montañes, un espaciu onde nun faen falta grandes esfuercios p'asitiar les llendes, un espaciu onde un pueblu afita firmemente los sos raigaños.

Dende Unión Renovadora Asturiana trabayamos pa facer efeutiva la participación de tolos asturianos na vida social y política d'esta comunidá.

El faru d'Unión Renovadora d'Asturias representa la ilusión y l'amor por Asturies que nos guía a un futuru prósperu pa nosotros y pa los nuestros fíos.

Próximamente, nestes páxines podrás visitar los faros d'Asturies, quince faros que, güei en día constituyen  l'emblema de la vocación mariñana y pescadora de la nuestra comunidá y qu'URAS quier adoptar como símbolu del nuestru compromisu con esta tierra.

Unión Renovadora ye una formación política rexonalista.

Esta definición naz del reconocimientu de la identidá d'Asturies como pueblu, somos Asturianos dientru'l territoriu Español, pero creemos que les peculiaridaes d'esta comunidá deben ser respetaes nel contestu estatal.

Asturies demanda cuotes crecientes d'autonomía política y económica que permitan el nuestru desenvolvimientu como pueblu y la recuperación y desenvolvimientu de los drechos tradicionales d'Asturies.

Buscamos soluciones eficaces a los problemes actuales d'Asturies poniendo l'acentu n'Asturies como exa vertebradora y acoyendo nes nuestres files a tou aquél que sabe poner a Asturies per delantre de los sos propios intereses.